Iloilo City – Liwat naman nga ginlaslasan ni Iloilo City Mayor Jerry Treñas ang mga nagapakamalaot kag nagabasol sa mga tinawo sang Public Safety and Transportation Management Office bangud sa pagpugok sang trapiko sa Ungka Flyover.
Sa interview sang Bombo Radyo kay Treñas, iya ginpahayag nga indi na kuntani obligasyon sang syudad bangud indi na ini sakop sang ila jurisdiction.
Suno sa alkalde, ipull-out niya ang ginpang-deploy nga mga traffic aides sang syudad nga naga-manage sang trapiko sa nasambit nga flyover.
Gin-athag sang natungdan nga indi proyekto sang Iloilo City Government ang Ungka flyover bangud iya ini sang national government.
Samtang, nagpaandam naman si Treñas nga handa ini nga atubangon ang mga nagapakamalaot sa mga empleyado sang syudad nga wala sang kahilabtanan sa problema sang depektibo nga flyover.
