Balantayan subong nga 2024 ang liwat nga pag-atubangay sang boxing legends nga sanday Manny “Pacman” Pacquiao kag Floyd Mayweather Jr.
Mismo ang 45-anyos nga Pinoy eight-division world champion ang nag-anunsyo sang amo nga exhibition match kadungan sang New Year’s eve event sang Rizin Fighting Federation sa Saitama, Japan.
Matandaan nga Mayo 2015 sang una nga nag-atubangay ang duka ka boksidor kun sa diin nagdaog si Mayweather, 46, paagi sa unanimous decision kag iya man natingob ang WBC, WBA, kag WBO welterweight titles.
Ang amo nga sambuwa nga ginakabig “Fight of the Century” amo ang nagguba sang pay-per-view records nga may ginabanta nga 4.6 million subscribers nga labaw pa sa 2.48 million nga na-record sa Oscar de la Hoya-Mayweather bout sang 2007.
Pareho na nga nag-retiro sa professional boxing sanday Pacquiao kag Mayweather apang pareho man sila nga nagabalik sa ring paagi lamang sa exhibition bouts.
Ulihi nga nakahampang ang Pinoy boxer sang Disyembre 2022 kun sa diin ginlutos sini ang South Korean YouTuber nga si DK Yoo paagi sa unanimous decision.
Sa Abril, natalana nga atubangon ni Pacquiao ang muay thai legend nga si Buakaw Banchamek sa isa man gihapon ka exhibition bout.
Si Mayweather naman nga may malimpyo nga 50-0 record antes nag-retiro ang ulihi nga naghampang batok kay John Gotti III sa Sunrise, Florida, USA sang nagligad nga Hunyo 2023 nga gin-untat sa ika-anum nga round bangud sa trash talk kag indi pagtuman sa referee kag sang ulihi nag-resulta sa ginamo sang nag-intra na ang fans, nagsululod sa boxing ring, kag nag-ilinaway.# Photograph: John Locher/AP via The Guardian
