Indi makatambong si WBA World Welterweight Champion Senator Manny Pacquiao sa State of the Nation Address ni Presidente Rodrigo Duterte subong nga adlaw.
Ini mismo ang ginkumpirma sang iya tiayon nga si Jinkee Pacquiao pinaagi sa text message.
Santu sa mensahe nga ginpalab-ot ni Jinkee, nagpanugyan ang doktor sa senador nga mahimo ini makabalik sa Pilipinas sa Dominggo sang gab-i oras sa Las Vegas.
Ini man bangud nga nagabatyag sang sakit sa mata ang iya bana kadungan sang madinalag-on nga away sini kay American boxer Keith Thurman.
Wala naman sang iban pa nga injuries si Pacquiao magluwas na lamang sa sakit sang iya mata.
Antes pa man ang hampang ni Pacquiao, ginpahayag ni Senate President Vicente Sotto III nga nakabaton siya sang mensahe gikan sa senador nga magakitaay sila subong.
Apang bangud nga indi ini pagpahanugutan sang doktor nga makapauli gilayon sa Pilipinas, indi na makatambong pa ang senador sa SONA sang Presidente.
Nahibaluan nga nagdaog si Pacquiao batuk kay Thurman pinaagi sa split decision.
