Arestado ang isa ka 23-anyos nga Filipino-American kaangot sa pagbuno-patay sa tatlo sa iya nga mga himata sa Baldwin Park, California, USA isa ka adlaw matapos ang selebrasyon sang Paskwa.
Gin-identify sang Los Angeles County Medical Examiner ang mga biktima nga amo sanday Mia Chantelle Narvaez, 8; Paul Sebastian Manangan, 16; kag Rona Nate, 44.
Santo sa mga kasilingan, ini nga magpamilya ang lunsay halin sa Pilipinas.
Wala naman ginpaguwa sang Baldwin Park Police Department ang pangalan sang suspek.
Base sa police report, nakaangkon sang mga pilas ang mga biktima tuga sang pagkabuno kag lunsay ginpangdeklarar nga dead on the spot.
Ginatun-an pa sang otoridad kun ano ang motibo sang suspek nga nadiskubrehan nga nagapuyo man kaupod sa mga biktima sa balay kun sa diin nagluntad ang krimen.
Sang nag-abot ang mga pulis sa area, naghingagaw pa sa pagpalagyo ang suspek apang nakabunggo rason nga nadakpan sang otoridad kag gin-detain sa suspetsa nga siya ang may kahimuan sa murder.
