Patigayunon na subong nga adlaw sa Beverly Hills, California, USA ang prestihiyoso nga Golden Globe awards — ang labing-una nga daku nga selebrasyon sa Hollywood kasunod sang anum ka bulan nga protesta sang actors kag writers nga amo ang nag-shut down sang kadam-an sang show businesses sang nagligad nga tuig.
Ini nga red carpet, champagne-fueled awards ceremony ang magapasidungog sang pinakamaayo nga nga mga pelikula kag television projects nga pilion sang 300 ka entertainment journalists halin sa lain-lain nga mga pungsod.
Ang Golden Globe Awards ang gina-produce kag ginapanag-iyahan sang Dick Clark Productions. Sarang ini malantaw sa masobra 200 ka mga pungsod kag teritoryo sa kalibutan kag isa sa pila gid lamang ka awards ceremonies nga nagalakip sang motion picture kag television achievements.
Nagapanguna sa nominees ang summer blockbuster nga “Barbie” nga may siyam ka nominasyon kag may walo naman ka nominasyon ang historical drama nga “Oppenheimer” nga nagasunod naman sa istorya sang paghimo sang atomic bomb.
Magluwas sa A-list crowd sa pelikula kag telebisyon, lauman man ang pagtambong sang American pop icon nga si Taylor Swift nga nominee man bangud sa iya concert film nga “Taylor Swift: The Eras Tour” nga napaidalom sa bag-o nga kategorya sa cinematic kag box office achievement.
Subong man nga aga oras sa Pilipinas, magahimo sang maragtas ang 52-anyos nga komedyante nga si Jo Koy ukon si Joseph Glenn Herbert Sr. bilang labing-una nga Filipino-American nga maka-host sa Golden Globes sa sulod sang 81-anyos sini nga maragtas. #
(Photo: Getty Images)
