Nagpirma sa statement ang masobra 30 ka Filipino-Chinese business groups agud magpanawagan sang malinong nga paga-resolba sa tensyon sa West Philippine Sea.
Kasunod ini sang pagbangga sang China Coast Guard sa mga sakayan sang Pilipinas kadungan sang rotation and reprovision (RORE) mission sa Ayungin Shoal sang nagligad nga Lunes, Hunyo 17.
Sa sini nga statement, 33 ka Filipino-Chinese chambers sang commerce kag civic organizations ang nag-apelar sa gobyerno sang Pilipinas nga ikonsiderar ang banas nga magapasigurado sang kalinong, katawhayan, kag safety sang duha ka mga nasyon kag mga pumuluyo sini.
“Instead of strife, let us choose harmony. Instead of conflict, let us choose stability. In these tumultuous times, with rising tensions in other parts of the world, let us not risk the unity that has prevailed in our Asian region for hundreds of years,” kabahin sang statement.
Ginsiling man sang mga grupo nga madugay na nga mga henerasyon ang ginlawig sang Filipino-Chinese cultural and economic ties.
“Together we endured the trials of World War II and remained allies in many ways. Our nations have consistently showcased the manifold benefits of mutual respect. As such, we implore both sides to refrain from actions or declarations that will only fuel the already precarious situation.”
Ginpanawagan man ang pagtukod sang neutral kag diplomatic venue para sa diskusyon nga magatib-ong sang mutual respect para sa Pilipinas kag China.
“We firmly believe that only through constructive dialogue, devoid of reproach and condemnation, are we to find common ground that will lead to an amicable resolution of our differences,” dugang diri.
Lakip sa signatories amo ang Federation of Filipino-Chinese Chambers of Commerce and Industry, Chinese Filipino Business Club, Hong Kong Chamber of Commerce of the Philippines, kag ang Filipino-Chinese Youth Business Association.
