Positibo ang Federation of Filipino Chinese Chambers of Commerce and Industry, Inc. nga magapadayon ang relasyon sang China kag Pilipinas sa negosyo kag pang-ekonomiya apisar sang nagasaka nga tensyon sa West Philippine Sea.
Suno sa president sang federation nga si Dr. Cecilio Pedro, ang China amo ang pinakadaku nga market sa kalibutan gani ginakabig man ini nga mayor nga trading partner para sa mga negosyo nga nagatuon pa lamang kun paano sila magsangkad.
Pahayag pa sini, pwede gid nga mapaiway ang mga geopolitical issues kaangay sang away sa West Philippine Sea agud nga matib-ong man ang pang-ekonomiya nga relasyon sang nagkalain-lain nga mga pungsod.
Dapat suno sa iya nga magbuligay ang duha ka nasyon agud nga maka-kontribwer sa gross domestic product (GDP) growth sa 2024.
Ang Chinese manufacturing firms suno sa iya ang nagalantaw sa Southeast Asia para sa expansion nga isa gid ka maayo nga kahigayunan sa Pilipinas.
Una na nga ginpahayag ni Chinese Ambassador to Manila Huang Xilian nga ang China amo ang pinakadaku nga trading partner sang Pilipinas sa sulod na sang walo ka sunod-sunod nga tuig.
Subong nga Marso, duha na ka separado nga insidente sang water cannon attack ang ginhimo sang China Coast Guard sa barko sang Pilipinas sa West Philippine Sea nga magakadto kuntani sa Ayungin Shoal para sa resuplly mission sa BRP Sierra Madre.#
