Nagalaum ang 33 anyos nga Filipina-American nga maangkon niya ang isa ka pwesto sa pagka-konsehal sa La Palma City, Orange County, California subong nga local elections sa Estados Unidos.
Sa interview sang Bombo Radyo kay April Kamilah Bautista nga isa man ka registered democrat, iya ginpahayag nga tatlo ka spots ang bukas subong nga 2020 elections kun sa diin anum sila nga mga kandidato ang nagasumpunganay.
Sa La Palma City ginbun-ag kag nagdaku si Bautista apang taga-Nueva Vizcaya ang iya nga iloy kag taga-Ilocos Sur ang iya nga amay.
Suno kay Bautista, nagdaku siya nga bukas ang paminsaron sa social issues kag malapit ang tagipusuon sa komunidad, rason nga indi na bag-o sa iya ang pulitika.
Naggradwar siya nga may degree sa Political Science and Peace and Conflict Education sa University of Hawaiʻi sa Mānoa sa Honolulu, Hawaii, kag kasunod sini, nagtrabaho siya kaupod ang mga mamalidha.
Nagtrabaho man si Bautista sa isa ka non-government organization kun sa diin natutukan niya ang problema sa undocumented immigration ukon TNT ukon tago nang tago nga mga Pinoy.
Ini ang sa idalom sang Deferred Action for Childhood Arrivals (DACA) program nga gintukod sang Obama-Biden administration sang 2012 nga nagahatag sang temporaryo nga kinamatarong sa mga immigrant nga makaistar, makatuon, kag makatrabo sang legal sa Amerika.
Magluwas sa pagbulig sa mga naga-TNT nga mga Pinoy, advocate man si Bautista sang mental health kag environment.
Kun maeleher sa pwesto sa pagkakonsehal, plano ni Bautista nga dal-on ini nga maaktuhan ini nga mga adbokasiya kag mapataas man ang voter turnout sa La Palma City, mapasuod ang mga tawo sa mga elected officials, kag mapakilala ang feminist recovery plan.
Ginpahayag ni Bautista nga 40% sang mga nagaistar sa La Palma City ang mga Asia, kag lakip na diri ang mga Pinoy nga nagatrabaho bilang mga health workers kag educators nga ginalauman man niya nga magasuporta man sa iya sa palaabuton nga November 3 local elections sa Estados Unidos.
