ILOILO CITY – May yara sang bentaha kag disbentaha ang pag-angkon sang mixed-race.
Ini ang ginpamatud-an sang Filipina-British nga si Julie Prescott-Gonzales paagi sa Good Morning Philippines program, kun sa diin iya ginpatpat kun ano ang mga maayo kag indi maayo nga epekto sang pag-angkon sang dual citizenship.
Suno kay Prescott-Gonzales, ginbun-ag kag nagdaku siya sa Pilipinas sa Pinay nga iloy kag British nga amay apang nagpangabuhi na sila sang iya pamilya sa United Kingdom sang nakatapos na siya sa pagtuon.
Ginpahayag ni Prescott-Gonzales nga gintudlu-an siya sang iya ginikanan sang Filipino kag British culture kag naglab-ot sa punto nga bisan siya ang naka-angkon sang identity crisis.
Bilang Filipina-British, indi malikawan nga may yara sang connotation sa iya pagkatawo kun sa diin diri sa Pilipinas, nagakasal-an siya nga foreigner apang kun sa United Kingdom naman, nagakasal-an siya nga Asian.
Ang pag-angkon sang dual citizenship suno kay Prescott-Gonzales ang naghatag sa iya sang madamo nga prebelihiyo kag job opportunities sa Pilipinas kag sa United Kingdom.
Apisar sini, ginpahayag sang natungdan nga wala siya naka-ekspryensya sang tuman ka lala nga racial discrimination apang indi man malikawan kun kaisa nga may yara sang sala nga pagpati ang mga foreigners batok sa mga Filipino.
May kaangtanan naman sa nagakwestyon sa iya pagkatawo, ginpahayag ni Prescott-Gonzales nga indi makwestyon ang iya nga pagka Pilipino kag amo man sa iya nga pagka British citizen bangud nga ang pagtumod sang citizenship ang wala nabase sa physical appearance kundi ini ang nabase sa pagpalangga kag kun paano ikabuhi ang namat-an nga kultura.
