Ginkumpirmar sang Philippine Embassy sa Israel ang pagkapatay sang isa ka Filipina caregiver nga si Leah Mosquera, 49 anyos, halin sa Negros Occidental, matapos siya maigo sang Iranian missile nga naglupok sa iya apartment sa Rehovot, Israel sadtong Hunyo 15.
Suno sa embahada, si Mosquera ang gilayon nga gindala sa Shamir Medical Center matapos mag-angkon sang seryoso nga pilas sa lawas.
Siya ang ginpaidalom sa pila ka operasyon sa ICU sa sulod sang pila ka semana, apang ginbawian gid ini sang kabuhi.
Ang iya kamatayon ginpabutyag sang iya utod nga si Joy, nga nagtatrabaho man sa Israel bilang OFW.
Ginlaragway sang embahada nga isa ka mabuot nga tawo si Leah, sa kilala man ini sa kumonidad bilang Ate Leah, kag kuntani magasaulog sang iya ika-50 nga kaadlawan sa Hulyo 29.
Sa subong, ginahikot na sang embahada ang tanan nga kinahanglanon para sa repatriation sang iya bangkay pabalik sa Pilipinas, upod man ang iban pa nga ayuda para sa pamilya ni Mosquera.
Ang insidente kabahin sang nagapadayon nga tensyon sa tunga sang Israel kag Iran, nga nagsugod sadtong Hunyo 13 sang maglunsar sang airstrikes ang Israel batok sa Iran.
Nagapadayon ang panawagan sang gobyerno nga mangin alerto ang mga OFW sa mga lugar nga may peligro, kag nagapangayo sang hustisya para kay Leah kag iban pa nga biktima sang amo nga insidente.
