Ginlutos sang Asian powerhouse nga South Korea ang women’s football team sang Pilipinas, 3-0, sa una nga friendly match nga ginpatigayon sa Icheon City Stadium, Abril 5.
Pareho nga wala sang skor ang duha ka teams sa first half, apang sang 17-minutos na lamang ang nabilin antes magtakop ang full time, asud-asud ang goals sang kasumpong paagi kanday Choe Yuri, Ji Soyun kag Jang Selgi.
Magakit-anay liwat ang duha ka teams 6:00 sang gab-i sa Lunes (oras sa Pilipinas) sa amo gihapon nga venue para sa isa pa ka friendly match nga amo naman ang maga-kumpleto sa sini nga international window.
Ini na ang ika-apat nga match subong nga tuig nga nalutos ang Filipinas sa idalom ni Coach Mark Torcaso kun sa diin lunsay man superior teams ang nakaatubang sang national team bilang preparasyon sa mga sambuwa sa 2025 lakip na ang AFF Women’s Championship kag ang Thailand Southeast Asian Games.
Kun matandaan, ginpierde man sang South Korea ang Pilipinas sa semifinals sang 2022 AFC Women’s Asian Cup kag sa Hangzhou Asian Games group stage sang nagligad nga tuig.
Sa world ranking, nagapang-20 ang South Korea samtang pang-39 naman ang team sang Pilipinas. #
