Nagtakop na ang kampanya sang Philippine women’s football team sa 2024 AFC Olympic Qualifying Tournament.
Apisar nagdaog ang Filipinas batok sa Iran, 1-0, sa Perth Rectangular Stadium sa Australia kaina sang hapon, naalangan ini nga makasulod sa Paris Olympics matapos ang performance sang Uzbekistan subong nga gab-i nga amo ang nangin best second place team sa second round.
Photo: Philippine Women’s National Football Team
Pareho nga may 2-0-1 win-draw-loss records ang Uzbeks kag ang Filipinas, apang ang Uzbekistan ang maga-abanse sa third kag final round bangud sa +2 goal difference ipaanggid sa -4 GD sang Pilipinas.
Sa second round sa Olympic qualifiers, ginasunod ang single round-robin format kun sa diin ang tatlo ka group winners kag ang best group runners-up ang magapadayon sa katapusan nga phase nga patigayunon sa Pebrero 2024.
Ang forward sang national team nga si Sarina Bolden ang top scorer sang Filipinas sa amo nga kampanya nga may lima ka goals.
Matandaan nga antes ang 1-0 nga kadalag-an batok sa Iran paagi sa goal ni team captain Tahnai Annis, una na nga ginlutos sang Pilipinas ang Chinese Taipei, 4-1, apang ginkamasaan ini sang World No. 11 kag powerhouse team nga Australia, 0-8, sa ikaduha nga match. #
