Nagtanyag sang bulig ang grupo sang Chinese-Filipino businessmen sa 22 ka mga crew members sang F/B GemVer 1 ng ginsalakay sang sakayan sang chinese crew sa Reed Bank sa West Philippine Sea.
Nagpanawagan ang Federation of Filipino Chinese Chambers of Commerce and Industry Inc. (FFCCCII) nga seryosohon ang natabo nga bunggo-anay sang Chinese vessel kag sakayang pandagat sang mga Pilipino .
Suno kay federation president Henry Lim Bon Liong, nagatanyag sila sang sinsero nga bulig kag suporta sa pagkaayo sang fishing boat sang mga Pilipino.
Dugang pa sang natungdan, samtang gina-imbestigahan sang Pilipinas kag China government kun ano ang natabo, isa lang ang matuod kag sigurado ang grupo nga ang 22 ka mga Pinoy ang nadulaan sang ila fishing vessel nga ginagamit sa ila palangabuhian.
Samtang ang iban nga mga business groups ang nagpasalig na nga maghatag sang P1 million bilang bulig sa mga manugpangisda.
Tunga sang kwarta ang para sa livelihood support sa mga manugpangisda samtang ang tunga naman ang para sa pagpakaayo sang sakayang pandagat.
Gilayon nga naghatag sang bulig ang mga business groups bangud man sa hingyo sang Mindoro Chamber of Commerce.
Nahibaluan nga sang Hunyo 9, ginsalakay sang Chinese vessel ang sakayang pandagat sang mga Pilipino sa diin sa baylo nga buligan ang mga manugpangisda nga masalbar sa baybayon, gintalikdan lamang sila kag ginbayaan sang mga Chinese crew.
