ILOILO CITY- Naglunsar sang isa ka fund-raising campaign ang Filipino community sa New Zealand agud ibulig sa mga biktima sang natabo nga aksidente nga ginkamatay sang pito ka magpamilya kalakip na ang pila ka Filipino.
Natabo ang aksidente sa southern part sang Picton, New Zealand kun sa diin nagbunggo ang ila ginasakyan nga van sa isa ka truck.
Ang mga napatay nga biktima amo ang masunod: Pinay nga si Diseree Brown, 48 anyos; bana sini nga si Paul Brown, 61; ila anak nga si Mark, 14;utod ni Diseree nga si Divine Dolar, 56; anak ni Divine nga si Flordeliza Dolar, 19; umagad ni Desiree kag anak sini nga 10 ka bulan.
Nakaluwas naman sa aksidente ang duha ka anak nga lalaki ni Diseree nga sanday Pedro Clariman, 26, kag Luie Lagud, 16, apang padayon nga ginabulong sa ospital.
Suno kay Bombo International Correspondent Tess Peeters direkta sa New Zealand, sa subong nakatipon na sila sang malapit sa 50,000 dollars ukon kapin P2.5 million pesos agud ibulig sa mga survivors.
Nahibaluan nga wala naman nakaupod sa byahe ang tatlo ka iban pa nga kabataan ni Diseree.
