IRELAND– Padayun nga ginatudlo sang isa ka amay sa iya lima ka tuig nga anak ang mga Filipino Values, apisar nga yara ang mga ini nagapuyo sa Ireland.
Sa interview sang Bombo Radyo kay Steven Mark Espinosa pinaagi sa Good Morning Philippines Program, iya ginpahayag nga bilang isa ka amay, ginasigurado niya nga matudlo sa iya anak ang mga nagakadapat sini nga mahibaluan.
Suno kay Espinosa, apisar nga Ingles ang linggawahe nga ginagamit sang iya anak, naga-amat-amat na ini sa subong tuon sang Hiligaynon, bangud pursigido ini nga makahibalo.
Magluwas sa pagtu-on sang Hiligaynon, ginatudlo man sini sa iya anak ang Filipino Values kaangay sang paggamit sang po at opo, magbisa kag magrespeto sa mga tigulag.
Nagapangabay man ini sa tagsa ka mga amay nga hatagan sang nagakaigo nga tion ang ila mga kabataan agud mas mapabakod pa ang ila relasyon bilang mag-amay
