Gin-athag ni Presidente Rodrigo Duterte nga kun boluntaryo nga mag-resign si Department of Health (DOH) Secretary Francisco Duque III, batunon niya; apang, indi siya magmato-mato sa pagpapahalin sa amo nga tiglikom.
Ikapila na ini nga pag-apin ni Duterte kay Duque sa tunga sang panawagan sang publiko nga islan na ang tiglikom sang health department ilabi na sang nag-gwa ang audit reports nga may ginaalegar deficiencies sa paggamit sang pondo nga para kuntani sa COVID-19 response.
Gin-athag man sang presidente nga masipa lang niya si Duque sa posisyon kun kurap ini nga opisyal.
Ginpasalig man sang presidente nga panindugan niya si Duque bangud wala man siya sang nakit-an nga sala sa iya nga leadership.
