Ginpangayuan sang Department of the Interior and Local Government (DILG) sang imbentaryo ang Bureau of Fire Protection – Western Visayas kaangot sa mga fire truck kag fire equipment sa rehiyon.
Sa interview sang Bombo Radyo kay DILG Undersecretary for Public Safety Jed Patrick Mabilog, iya ginpahayag nga ginhatag niya ang mandu kay BFP Region VI Regional Director Fire Chief Superintendent Edwin Vargas kadungan sang ila pagkit-anay agud nga istoryahan ang pagpalya sang truck sa Estancia.
Suno kay Mabilog, kun may inventory na para sa Region VI, mahisayran sang ahensya kun ano ang kulang kag problema sa BFP kag mahatagan ini sang solusyon.
Dugang ni Mabilog, ginahimo nila ini sa tanan nga mga rehiyon sa pungsod kasunod sang mandu halin kay Interior Secretary Jonvic Remulla agud nga mapasangkad ang kapasidad sang BFP.
Matandaan nga sang Marso, naistoryahan naman sa regular session sang Sangguniang Panlalawigan ang problema sang probinsya sang Iloilo sa fire protection services kag unserviceable fire trucks.
Ini ang kasunod sang nagluntad man nga sunog sa banwa sang Bingawan kun sa diin patrol car sang pulis ang nag-responde sakay ang mga bombero nga may dala sang fire extinguishers kag nagtawag man sang back up sa Calinog Fire Station.
Ginsundan pa gid ini sang isa pa ka sunog sa katapusan nga semana sang Pebrero kag sa maayo nga kahimtangan, wala sang may nasamaran kag indi dako ang nagluntad nga sunog.
Sa Iloilo, una na nga ginpahayag sang BFP nga may 15 tanan nga unserviceable fire trucks kag kalabanan diri ang old model/unit na apang ginpaidalom sa gihapon sa major repairs.
Magluwas sa BFP, target man sang DILG nga nga mahatagan sang atensyon ang kinahanglanon pati sang iban nga ahensya kaangay sang Bureau of Jail Management and Penology (BJMP).#
