ILOILO – Napatay kahapon, Hulyo 29, ang labing-una nga pasyente sa probinsya sang Iloilo nga infected sang delta variant sang COVID-19.
32 anyos ang amo nga pasyente, babayi, kag residente sang isa ka barangay sa banwa sang Cabatuan.
May kidney problem ang pasyente kag ginapahayag nagapa-dialysis duha ka beses sa isa ka semana.
Sa interview sang Bombo Radyo kay Cabatuan Mayor Ronilo Caspe, iya ginpahayag nga kahapon lang nga adlaw naghatag sang impormasyon ang Provincial Epidemiology and Surveillance Unit angot sa amo nga local case.
Yari ang timeline sang pagpositibo sang amo nga pasyente:
- Hunyo 27, gin-admit sa Western Visayas Medical Center (WVMC) ang pasyente bangud nabudlayan ini nga magginhawa. Negatibo ang resulta sang swab test.
- Samtang yara sa ospital, nagpositibo sa COVID-19 ang isa ka pasyente sa hospital section kun sa diin yara man ang 32 anyos nga babayi
- Hulyo 8, naggwa nga COVID-19 positive na ang babayi
- Hulyo 23, ginpatigayon ang repeat testing, negatibo na sa COVID-19 ang babayi
- Hulyo 26, nagpauli siya sa balay
- Hulyo 27, gin-admit liwat sa ospital bangud nabudlayan liwat magginhawa
- Hulyo 28, naggwa ang swab test result kag negatibo siya sa COVID-19
- Hulyo 29, napatay ang pasyente, 2:00 sa kaagahon
Ginapahayag nga wala sang travel history ang pasyente.
