Nabulsa ni Ernest John “EJ” Obiena ang iya imbukada nga gold medal sa pole vault subong nga 2025 matapos nagpangibabaw sa Meeting Metz Moselle Athlelor sa Metz, France.
Nalukso sini ang 5.70 meters sa isa lamang ka attempt antes napaslawan sa 5.85m sa tatlo ka mga attempt.
Antes sini, ginlaktawan sang Pinoy Olympian ang 5.20 kag ang 5.35 meters, gin-clear ang 5.50-m sa isa lamang ka lukso, kag nag-pass liwat sa 5.60 meters.
Siya ang may best finish sa tournament kag ginsundan ni Menno Vloon nga may 5.70m outing man apang nagpangaduha lamang sa ranking via countback. Lakip man sa pito nga nalutos ni Obiena amo ang Tokyo Olympic silver medalist nga si Christopher Nilsen nga nagpangatlo matapos ang 5.60m showing.
Ini ang una nga kadalag-an ni Obiena sa bag-o nga indoor season matapos nagpangaduha sa International Jump Meeting Cottbus sa Lausitz-Arena sa Germany sang Enero.
Balantayan man ang pagdepensa sang Filipino pride sa iya nga titulo sa ISTAF Indoor Tournament subong nga adlaw matapos sini na-clear ang 5.93 meters sang nagligad nga tuig.
