Kumpirmado nga magatudlo si first Lady Atty. Louise “Liza” Cacho Araneta–Marcos sa College of Law sang West Visayas State University (WVSU).
Sa exclusive interview sang Bombo Radyo kay Dr. Joselito Villaruz, presidente sang WVSU, iya ginpahayag nga magatudlo ang first lady bilang professor sa Criminal Law 1.
Maga-umpisa naman ang klase sang WVSU College of Law sa Agosto 15.
Suno kay Villaruz, napili sang first lady nga magtudlo sa WVSU bangud may mga pamilya ini nga taga Iloilo.
Ang first lady ang ginbun-ag sa Manila sa diin ang iya iloy amo si Milagros Cacho kag ang amay naman sini nga Filipino basketball Olympian nga si Manuel Araneta Jr. ang tumandok sang Iloilo City.
Antes sa WVSU, una na nga nagserbe bilang law professor ang first lady sa Mariano Marcos State University, Saint Louis University, Pamantasan ng Lungsod ng Maynila, Northwestern University, kag Far Eastern University.
Nahibaluan nga si Araneta-Marcos ang founding partner sang MOST (Marcos, Ochoa, Serapio, & Tan) Law sa diin nagatutok ini sa criminal law.
Nagkuha ini sang pre-law nga kurso nga Interdisciplinary Studies sa Ateneo de Manila University.
Nagtapos naman ini sang abogasya sa Ateneo de Manila Law School.
May Masteral units man ini sa Criminal Procedure sa New York University.
Ulihi ini nga nagtudlo sa Mariano Marcos State University College of Law sa diin nagserbe man ini bilang assistant dean.
Nag-untat ini sa pagtudlo matapos nabudlayan sa pag-shift sa face-to-face classes pakadto sa online learning bangud sa COVID-19 pandemic.
Temporaryo naman ini nga nagbiya sa iya law firm agud tungdan ang iya trabaho bilang First Lady.
