𝗚𝗨𝗜𝗠𝗔𝗥𝗔𝗦 — Nangin dinapit nga bisita sa probinsya sang Guimaras si First Lady Liza Araneta-Marcos sa ginlunsyar nga Children’s First 1000 day experiment.
Sa interview sang Bombo Radyo kay Former Senator Jose D. Lina, National Chairman sang Children’s First 1000 Days Coalition, iya ginpahayag nga mismo si First Lady Liza Marcos ang nagpromisa nga suportahan sini ang mga programa sang proyekto.
Suno kay Former Senator Lina, tinutuyo sang programa nga mapasiguro nga makakuha sang insakto nga ihibalo ang mga nagabusong sa mga nagakadapat nila himuon agud maka-angkon sang insakto nga nutrisyon sa sulod sang 1000 ka adlaw.
Ginpahayag man ni Lina nga magabuligay monitor ang Barangay Nutrition Council, Municipal Health Unit kag mga NGO’s sa mga mangin benipisyaryo sang programa agud matumod kun nagakaon sila sang mga healthy food kag nagapabakuna.
Ginpatpat man natungdan ang importansya sa pag-atipan sang bata kag nanay sumugod sang nagabusong palang tubtob nga makalab-ot sa duha ka tuig ang bata, ilabi na nga madamo sang negatibo nga epekto kung malnourish ang mga kabataan.
Kabahin diri ang posible manubo nga height kag mahina nga pagproseso sang kaisipan agud makahibalo.
Nahibaluan naman nga naglab-ot sa 50 ka mga nagabusong sa Guimaras ang nangin kabahin sa pilot implementation sang programa.
Nakatalana man nga ipatuman ang proyekto sa tanan nga lugar sa Pilipinas.
Nahibaluan nga kabahin sa implementasyon sang programa ang Department of Health (DOH), Department of Agriculture (DA), Department of Interior and Local Government (DILG) kag Department of Social Welfare and Development (DSWD).
Tuyo sang programa nga makabulig sa 500,000 ka mga pregnant woman sa bilog nga pungsod.
