ILOILO CITY- Nalipay gid ang labing-una nga successful blood donor sa Dugong Bombo 2019.
Sa interview sang Bombo Radyo kay Rolly Sigre sang Badiangan, Iloilo, apang temporaryo nga nagatinir sa Mandurriao, Iloilo City, iya ginpahayag nga aga pa siya nga nagbugtaw agud magpadulong sa Iloilo Science and Technology University sa Burgos St., Lapaz, Iloilo City para magdonar sang dugo.
Suno kay Sigre, pito ka beses na siya nga nagdonate sang dugo sa diin tatlo ka bes siya sa Philippine Red Cross kag apat ka beses naman sa Dugong Bombo humalin sang 2016.
Ginpahayag ni Sigre nga ginpili niya nga sa Dugong Bombo magdonar sang dugo bangud nga nagasalig siya sa kredibilidad sang Bombo bilang numero uno nga estasyon sa Iloilo.
Bilang token of appreciation ukon pagpasalamat sang Bombo Radyo Philippines, ginhatagan sang specially designed Dugong Bombo T-shirt si Sigre, magluwas pa sa pag-enjoy sang free juice and snacks bangud sa iya voluntary kag selfless act.
