Mabudlay apang pinasahi ang balatyagon nga mangin isa ka first-time mommy, apang ano pa gid ayhan kun sa imo una nga pagbusong, anum gid dayon ka lapsag ang imo ginbun-ag?
Tumalagsahon ini nga kaso kun sa diin nagakatabo lamang sang isa ka bes sa 4.7 billion — butang nga ginatawag sang iban nga isa ka milagro.
Apang amo ini ang natabo sa isa ka 27-anyos nga Pakistani nga mommy sang nagbun-ag ini sang nagligad lamang nga semana.
Ang iya nga sextuplets ang ginalakipan sang apat ka lalaki kag duha ka babaye.
Ginbata sila ni Mommy Zeenat Waheed sa ospital sa syudad sang Rawalpindi, Pakistan. Isa ka oras lamang ang pagbun-ag sini sa anum ka lapsaog suno sa ospital.
Bangud sa ila kadamuon, yara lamang sa below two pounds ang ila nga bug-at kag ginbutang anay sa incubator samtang yara pa sila sa medical facility.
Suno pa sa ospital, may mga kumplikasyon sa iloy sang tion sang labor, apang nangin estable na ang kondisyon sini makaligad ang pila ka adlaw sa bulig sang doktor kag iban pa nga paramedical staff. #
