Patay ang isa ka manugbaligya sang isda matapos nakaangkon sang ginapahayag 10 ka pilas sa lawas kasunod sang pagluthang sang wala pa nakilal-an nga suspek sa Iloilo Terminal Market subong gid lamang nga kaagahon, Enero 12.
Ang biktima amo si Melvin Roque, 46, residente sang Barangay Rizal Pala-pala II, Iloilo City Proper, kag ginapahayag duha ka tuig na nga nagabaligya sa merkado.
Natabo ang insidente sa entrance sang merkado kag ginapahayag kaadlawan pa subong sang biktima.
May walo naman ka basiyo kag duha ka slug sang 9mm nga nakuha gikan sa lugar kun sa diin natabo ang insidente.
Sa interview sang Bombo Radyo kay Abraham, isa man ka fish vendor kag abyan ni Roque, iya ginpahayag nga nagatupaday sila sang biktima kag nagaistoryahanay pa sang nag-abot ang isa ka lalaki nga nakasuksok sang maong nga jacket kag naka-helmet.
Ginapahayag nga wala na sang madamo pa nga istorya kag gin-diretso sa pagtiro sa ulo kag ginpasagunsunan pa.
Ginpahayag man nga pabalik sa direksyon sang Barangay Tanza, Iloilo City Proper ang pagpapalagyo sang suspek gamit ang isa ka itom nga motorsiklo.
Wala sang upod ang suspek sandig sa pahayag sang fish vendor nga nakakita sa insidente.
Wala man natandaan ang plate number bangud madulom pa ang area.
Gina-check pa subong ang kopya sang closed-circuit television camera samtang padayon man ang imbestigasyon sang mga pulis.
ILLEGAL DRUGS
Ginkumpirma ni Punong Barangay Noel Soliman sang Barangay Rizal Pala-Pala II nga nakaagi preso bangud sa iligal nga droga ang lalaki nga ginluthang-patay.
Sa interview sang Bombo Radyo kay Soliman, iya ginpahayag nga nakaguwa sang nagligad nga tuig paagi sa plea bargaining agreement ang biktima. Suno kay Soliman, pagkatapos makahalin sa presuhan, maayo na nga tawo si Roque kag nagapangabuhi sang husto paagi sa pagbaligya sang isda.##
