ILOILO CITY – Istrikto ang Iloilo City Government sa pagsulundan nga indi makabalik ang mga fish vendors sa pagbaligya sa merkado kun wala sang ipakita nga negatibo nga resulta sang reverse transcription polymerase chain reaction (RT-PCR) test.
Sa interview sang Bombo Radyo kay Iloilo City Mayor Jerry Treñas, iya ginpahayag nga ang mga manugbaligya sang isda ang kalabanan nga exposed sa coronavirus disease 2019 (COVID-19) bangud sa close contact sa mga taga-Iloilo Fish Port Complex nga ginkabig hostpot area sang virus sa syudad.
Suno sa alkalde, libre man ang pagpatigayon sang swab test sa Iloilo Jubilee Hall.
Una na nga ginpahayag ni Local Economic Enterprise Office (LEEO) head Maricel Mabaquaio nga required ang swab test negative results para sa mga fish vendors sa tanan nga merkado sa syudad.
Ginbuksan naman ang Jaro Small Market subong nga adlaw, Agusto 28.
Matandaan nga ginpaidalom sa lockdown ang amo nga merkado umpisa sang Agusto 23 bangud sang nagataas nga COVID-19 cases sa Brgy. Simon Ledesma sa distrito sang Jaro.
