Matapos nagpamatok sa desisyon sang gobyerno nga mag-import sang 25,000 metric tons sang isda, ginhangkat sang isa ka grupo sang manugpangisda si President Ferdinand “Bongbong” Marcos Jr. nga i-ban ang imported fish halin sa China.
Suno sa Pambansang Lakas ng Kilusang Mamamalakaya ng Pilipinas, kalain panumdumom kag doble-insulto nga ang nagapanguna nga ginahalinan sang imported fish sa pungsod amo ang China, ang pungsod nga nagabutang man sang ila dalagku nga barko kag nagapangisda sa mismo teritoryo sang Pilipinas.
Suno pa sa fishers’ group, ang round scad ukon ang galunggong nga iimport sang Pilipinas amo man ang masami nga nagakakuha gikan mismo sa West Philippine Sea ukon sa mga dagat sa Batangas, Mindoro, kag Palawan.
Matandaan nga gin anunsyo sang national government nga maga-import ang Pilipinas sang 25,000 metric tons sang frozen round scad ukon galunggong, bigeye scad, mackerel, bonito, kag moonfish agud indi magkulang ang suplay sa tion sang closed fishing season nga magaumpisa sa November kag matapos sa January 2023.
