Nagapangabay ang Aquaculture industry sa gobyerno nga indi man paghimuon nga rason ang bagyo agud nga iduso na naman ang pag-import sang isda para sa Pilipinas.
Suno sa mga grupo sang manugpangisda, bastante ang domestic supply sa pungsod kag indi kinahanglan ang importasyon.
Sa latest data sang Department of Agriculture, nagdangat sa P201.64 million ang napyerde sa fisheries sector matapos nga naapektuhan man sang bagyo ang fishponds kag ang cages sang bangrus kag tilapia amo man ang seaweed farms, kag nahalitan man ang non-motorized boats kag municipal fishing boats.
Apang suno kay Taal Lake Aquaculture Alliance Incorporated director Mario Balazon, indi ini bastante nga excuse agud nga pasudlan na naman sang imported fish ang local market.
Suno sa grupo, kuntani mahangpan sang gobyerno nga resilient ang fishing industry sa Pilipinas apisar ano pa ka kusog ang huyop sang hangin kag bisan ano pa nga pagbaha ang matabo.
Apelar sini sa national government, untaton na ang paggamit sa mga kalamidad bilang rason agud nga ma-justify ang pagpasulod sang produkto sang iban nga mga pungsod.
Mas maayo suno sa grupo nga suportahan anay ang mga manugpangisda diri sa Pilipinas antes magtalikod kag mangayo ukon magbakal sang isda sa iban nga mga pungsod.
