Fishers’ group, nagpaandam vs importasyon kasunod sang report nga naganubo ang produksyon sa pungsod

Nagpaandam ang fishers’ group nga Pambansang Lakas ng Kilusang Mamamalakaya ng Pilipinas (Pamalakaya) batok sa padayon nga importasyon sang isda.

Suno sa grupo, may nagguwa nga report sa pagsarurot sang produksyon sang isda, apang indi ini dapat paghimuon nga rason sang Department of Agriculture (DA) agud nga mag-import na naman sang tonelada nga suplay bangud maapektuhan sini ang local nga mga manugpangisda.

Ang ginatumod nga report sang grupo amo ang ginbalhag sang international conservation organization nga Oceana nga naganubo sang 45,000 metric tons ang mahulik nga mga isda sa Pilipinas sa kada tuig.

Ang ginplastar nga mga rason amo ang overfishing, illegal fishing, kag ang maluya nga pagpatuman sang fisheries law.

Suno naman sa Pamalakaya, ginapabay-an sang gobyerno ang ikaayo sang sektor sang mga manugpangisda ilabi na ang municipal fisheries subsector.

Halin sang 2018 suno sa grupo, masobra sa 200,000 metric tons sang isda lakip na ang tamudyos ang gina-import halin sa China, Taiwan, kag Vietnam.

Bilang resulta, nagnubo man ang farmgate prices ukon ang presyo sang hulik sang local fisherfolk.

“Ito ang dapat na mapagpasya at konkretong inaaksyunan ng pamahalaan, imbes na mag-angkat ng tone-toneladang isda na higit na pumipinsala sa lokal na produksyon,” kabahin sang statement sang grupo.

Una naman sila nagpaandam nga mas magaluya ang municipal fisheries production kasunod sang ruling sang korte nga nagatugot sa commercial fishing vessels nga mag-operate sa sulod sang 15-kilometer municipal waters.