Indi makaupod si First Lady Liza Marcos sa official visit ni President Ferdinand Marcos, Jr. sa Estados Unidos sang Amerika sa masunod nga semana.
Ginkumpirma ini ni Presidential Communications Office (PCO) Undersecretary Claire Castro apang wala sang ginhatag nga paathag kun ngaa indi makalakat ang First Lady.
Matandaan nga sa nauna nga kumpirmasyon sang Malacañang, magabisita ang punong ehekutibo sa Washington kag makigkita kay US President Donald Trump halin sa Hulyo 20-22. Natalana pa nga magpaguwa ang Palasyo sang dugang nga detalye sa amo nga byahe.
Lakip sa inisyal nga impormasyon amo nga parte sang delegasyon subong nga tuig amo si Trade Secretary Cristina Roque kag Special Assistant to the President for Investment and Economic Affairs Frederick D. Go agud maduso nga panubuan ang 20 percent US tariff sa Philippine goods.
Ini na ang panglima nga pagbisita ni Marcos sa US halin sang nagpungko bilang presidente sang 2022; kag una nga official visit halin sang na-eleher si Trump sang Nobyembre 2024.
Matandaan nga sang Abril sang nagligad nga tuig, sang nagbisita si Marcos sa US para sa trilateral meeting kaupod ang US kag Japan, wala man ang First Lady.
Napalibutan sang kontrobersiya ang iya pag-absent subong nga tuig bangud sang mga espekulasyon nga nagaangot sa iya sa kamatayon sang Rustan’s executive nga si Paolo Tantoco nga napatay sa Beverly Hills sang Marso isa ka adlaw matapos ginpatigayon ang Manila International Film Festival (MIFF) gala sa amo man nga hotel.
