𝗜𝗟𝗢𝗜𝗟𝗢 𝗖𝗜𝗧𝗬 — Ginkumpirma sang Taxi Operators in Panay (ATOP) nga may ipatuman nga P10.00 nga increase sa flag down rate sang mga taxi companies sa Panay nga posible mangin epektibo sa bulan sang Hulyo.
Sa interview sang Bombo Radyo kay Mr. Pefecto Yap, presidente sang Taxi Operators in Panay, iya ginpahayag nga ginahulat na lang ang “go signal” sang Land Transportation Franchising and Regulatory Board (LTFRB) agud ipatuman sa masunod nga bulan ang pagpataas sang pulo ka pesos sa flag down rate sang mga taxi.
Suno kay Yap, halin sa P40.00, mangin P50.00 na ang flag down rate sang taxi, ini kasunod man sang pag-apruba sang ila nangin petisyon nga na-file, duha na ka tuig ang nagligad.
Gin-athag man sang natungdan nga flagdown rate lang ang nagsaka kag wala na sa kada patak sang metro sa tagsa ka succeeding kilometer.
Nahibaluan nga ginbasehan ang pagtaas sang presyo sang gatong kag mga transport services sa pagpasaka sang ATOP sang presyo sang flag down rate.
Nagpasalig naman ang LTFRB nga ang matrix na lang ang ginahulat agud matigayon na nga maimplementar ang amo nga tikang.
