ILOILO CITY- Nagpatigayon sang flag raising kag wreath laying ceremony sa Panay Landing Memorial Marker sa Barangay Parara Sur, Tigbauan, Iloilo ang mga lokal nga opisyal sang amo nga banwa.
Ini may kaangtanan sa ika-76 nga anibersaryo sang Liberation of Panay subong nga adlaw.
Base sa maragtas, linibo nga American troops ang nagdungka sa baybay sang Parara, Tigbauan, Iloilo sadtong Marso 18,1945 sang panahon sang World War 2 sang napaidalom ang Iloilo sa Japanese imperial force.
Sa bulig sang American forces, natabog sang mga guerilla ang pwersa sang mga Hapon.
Sa sini nga maragtason nga hitabo, isa ka marker ang ginpatindog sa Parara Sur, Tigbauan bilang pagkomemorar sa kaisog kag pagkabaganihan sang Panay guerillas sang amo nga panahon.
