Lauman ang pagsaka sang airfare sa masunod nga binulan matapos gin-adjust sang Civil Aeronautics Board ang fuel surcharge sa airlines.
Sa advisory sang board, ginpahayag nga halin sa Marso 1 tubtub sa 31, yara na sa level 7 ang cargo fuel surcharge para sa domestic kag international flights.
Sa idalom sang Level 7, ang fuel surcharge para sa domestic passenger flights ang yara sa P219 tubtub sa P739 depende sa kalayuon.
Para naman sa international flights, yara ini sa P722.71 tubtub sa P5,373.69.
Mas mataas ini sa fuel surcharge nga yara sa Level 6 nga amo ang ginapatuman subong: P610.37 tubtub P4,538.40 sa international flights, kag P165 tubtub sa P665 para sa domestic destinations depende sa kalayuon. ##
