Imagine kun nagapanginit ka na sa delay sa imo nga flight, tapos nahibaluan mo nga ang rason gali kun ngaa naatrasar ang byahe amo ang hubog nga piloto!
Pakamaayuhon mo ayhan nga magsakay pa, ukon “no thanks, I love my life!”?
Natabo ini sa Japan nga ginkumpirma mismo sang Japan Airlines Co.
Ginpahayag nga ginkanselar sang damlag lang ang isa ka flight halin sa Dallas, Texas, USA nga pakadto kuntani sa Tokyo matapos nahubog ang 49-anyos nga piloto sa sulod sang hotel.
Ang involved diri amo ang Flight 11 nga magahugpa kuntani sa Haneda airport sang Myerkules.
Apang ang natabo: sang nag-abot ang pilot sa Dallas sang Lunes, nagpanyapon ini kaupod sa iban nga crew members sa isa ka restaurant.
Ginpadayon pa ang party sa lounge sang hotel nga ila ginatiniran amo man sa iya nga kuwarto.
Pasado 2:00 sa kaagahon sang Martes, nagsaway pa ang hotel staff sa ila nga hagan-haganon ang gahod, apang bangud daw indi na matolerar ang ginapahanghambal kag aktwasyon sang piloto, gintawag ang pulis.
Ginkadtuan gid sang pulis ang hotel kag ginpaandaman ang piloto nga indi na magliwat.
Naka-schedule naman kuntani nga maghalin ang flight 11:05 sang aga sang Myerkules, apang nag-desisyon ang airline company nga i-check anay ang pisikal kag mental status sang pilot.
Ginbuligan na lamang ang 157 ka mga pasahero nga masaylo sa iban nga flights.
Ang aircraft naman nga ginadala sang piloto ang ginpabalik sa Tokyo Haneda bilang flight JL11D kag wala sang sakay nga pasahero.
