Gin-athag sang FloWater Resources Iloilo Incorporated nga wala nagauntat ang ila pagsuplay kag produksyon sang tubig.
Ini ang kasunod sang pag-anunsyo ang Metro Pacific Iloilo Water nga may temporaryo nga shutdown sa isa sini ka mga bulk water suppliers.
Ang nasambit nga water interruption ang nagsugod umpisa ‘las 7 sa aga subong nga adlaw, Mayo 22, kag magalawig tubtob sa Domingo, ‘las 7 sa aga.
Ang apektado nga areas amo ang bilog nga distrito sang Jaro, Lapaz, Molo, Mandurriao, kag Iloilo City Proper.
Apektado man ang iban nga barangay sang Pavia kaangay sang Pagsangaan, Anilao, CPU Heritage Subdivision, Victoria Homes Subdivision, Brgy Ungka 1 kag Brgy Ungka 2.
Sa interview sang Bombo Radyo kay Joseph Dalmacio, operations manager sang FloWater Resources Iloilo Incorporated, iya ginpahayag nga wala nagauntat ang ila operasyon sa diin mahimo sila makadeliver sang tubig tubtob 30 ‘millions of liter per day.’
Suno kay Dalmacio, nakalab-ot ang impormasyon sa ila nga ang Prime Water Infrastructure Corporation, isa sa bulk water supplier sang Metro Pacific Iloilo Water, ang nag-angkon sang leak sa ila tubo humalin pa sang Mayo 14.
Ginpahayag ni Dalmacio nga bangud sini, nag-untat man ang ila pagsuplay sang tubig sa Prime Water.
Kun makasarang suno sa natungdan ang tubo sang Metro Pacific Iloilo Water nga magbaton sang tubig, handa man ang FloWater Resources Iloilo Incorporated nga magsuplay diri.
Nahibaluan nga may nagkalain-lain nga bulk water supplier ang Metro Pacific Iloilo Water.
