ILOILO CITY – Nagtuga sang pagpugok sang trapiko sa Sen. Benigno Aquino Jr. Avenue, Mandurriao, Iloilo City (Diversion Road) ang Float Parade of Lights.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga ang isa ka lane sang Diversion Road ang ginsirado nga amo ang gin-agyan sang Float Parade of Lights samtang bukas naman ang isa ka lane.
Suno kay Conlu, ang mga dalan malapit sa area ang may yara sang moderate to heavy nga traffic bangud sa nasambit nga kahiwatan.
Ginpahayag ni Conlu nga 9:00 subong nga gab-i ang gintalana nga oras nga matapos ang kahiwatan apang pasado 7:00 sang gab-i, ginbuksan na ang isa ka lane sang Diversion Road bangud nga natapos gilayon ang Float Parade of Lights.
Madinu-agon nga floats sang mga sponsor sa Dinagyang Festival 2020 ang nasaksihan sang mga tumalan-aw.
Kadungan sang kahiwatan subong nga gab-i, wala nalikawan nga nalasakan sang mga tumalan-aw ang mga tanum sa center island ilabi na nga wala sang may nagabantay nga greenguards.
Naghatag sang special performance ang Tribu Karab-Karab, Tribu Siga-Siga kag Tribu Bulalakaw nga champion sa Banaag Festival sang Anilao, Iloilo.
