ILOILO CITY- Patigayunon na subong nga hapon ang Float Parade nga isa sa mga aktibidad subong nga Philippine Independence Day sa Manila.
Sa interview sang Bombo Radyo kay Santa Barbara, Iloilo Mayor Dr. Dennis Superficial, iya ginpahayag nga makasaysayan ini nga adlaw para sa Iloilo Province nga ipakita ang manggaranon nga cultural heritage kag patriotic spirit pinaagi sa pag-showcase sang ‘Cry of Santa Barbara’ nga isa ka historic moment sa pagpakigbato sang kahilwayan batuk sa Spanish colonial rule.
Kaupod sang Iloilo nga magapartisipar sa Parade of Float ang siyam pa ka mga Local Government Units sa Pilipinas nga may significant historical events naangot sa Independence Day kag mga national government agencies.
Ang mapili-an nga winner sa LGU kag sa ahensya sang gobyerno ang makabaton sang cash prize nga P1 million.
Ang 10 ka mga nagpartisipar nga LGU para sa Float Parade amo ang The Cry of Candon (Ilocos Sur); Tres de Abril Revolt (Cebu); Battle of Alapan and the Proclamation of Philippine Independence (Cavite); Establishment of the Negros Republic (Negros); Cry of Santa Barbara (Iloilo); The First Flag Hoisting in Mindanao (Surigao del Norte); Siege of Fort Pilar (Zamboanga); Lowering of Spanish Flag in Jolo (Sulu); Siege of Baler (Aurora); kag First Session of the Malolos Congress and the Founding of the First Philippine Republic (Bulacan).
Pangunahan ni Iloilo Governor Arthur Defensor Jr. ang delegado halin sa Iloilo nga ginalakipan nanday Vice Gov. Christine Garin, mga alkalde, Provincial Board Members , Capitol department heads, kag Committee members.
Suno kay Mayor Superficial, magaperform man ang Kahilwayan Tribe sang Santa Barbara nga ginalakipan sang 50 ka mga performers nga amo ang magapakita sang dance drama.
Ang float sang Iloilo ang human sa native materials kag naga-feature sang simbahan kag kumbento sang Santa Barbara nga amo ang National Historical Landmark nga gindeklara sang National Historical Institute.
Nahibaluan nga Nobyembre 17, 1898 sang nagmarka ang historic moment sa diin natabo ang inagurasyon sang Revolutionary Government sang Visayas sa diin sa Santa Barbara, Iloilo una nga ginwagayway ang hayahay sang Pilipinas sa guwa sang Luzon.
