ILOILO CITY – Masaksihan online ang catechism session sa pagselebrar sang Flores de Mayo adlaw-adlaw, ‘las 3 sang hapon sa pihak sang Coronavirus Disease 2019 pandemic.
Sa interview sang Bombo Radyo kay Rev. Fr. Angelo Colada, director sang Commission on Social Communications sang Archdiocese of Jaro, iya ginpahayag nga bangud indi makapadulong ang mga kabataan kag katekista sa mga simbahan, gina-agda sang Simbahan Katolika nga saksihan ini online pinaagi sa Archdiocese of Jaro, Commission on Social Communications facebook page.
Suno kay Colada, una nga nangin katekista ang mga ginikanan gani ila subong responsibilidad nga giyahan kag tudluan ang mga kabataan sa pagpangamuyo samtang yara sila sa ila panimalay.
Pahayag niya, magluwas sa bulak, mahimo man nga maghalad ang mga kabataan sang pagkaon nga indi madasig nga madunot ukon mapan-os ukon magtipon sang kwarta agud nga pagkatapos sang bulan sang Mayo, mahimo ini nga mahatag sang mga kabataan sa mga kubos bilang bulig.
Subong nga ginadumili-an ang paguwa, ang balay ang magaserbe anay bilang simbahan.
