Flowater, magapanagtag sang libre nga matinlo nga tubig sa Iloilo subong nga El Niño

Sa katuyuan nga mabuligan ang mga taga Syudad kag pila ka mga banwa sa Iloilo bangud sa kakulang sang supply sang tubig subong nga El Niño, magapanagtag ang Flowater Resources Iloilo Incorporated sang libre nga potable water ukon tubig nga mahimo mainom.

Ini nga tubig ang indi lang basta pangbunyag, panglaba kag panghugas sang pinggan kundi tubig nga mahimo nga mainom.

Ini ang bukas sa tanan nga mga barangay nga sakop sang service area sang Flowater kaangay sang banwa sang Pototan, Zarraga, Leganes kag Syudad sang Iloilo.

Lakip sa mga dapat nga obrahon kag tandaan agud makakuha sang libre nga tubig amo ang mga masunod:

1. Nagakadapat nga ang mga Punong Barangay ang personal nga magpadulong sa opisina sang Flowater nga nahamtang sa R. Florete Building sa corner Rizal-Iznart Street Iloilo City ukon sa atubang sang Iloilo Central Market sa may Maria Claria.
2. Nagakadapat nga mag fill -up sang mga impormasyon nga kinahanglan sang water availment agud mahatagan sang claim stub para makakuha sang tubig nga ilimnon sa natalana nga adlaw.
3. Nagakadapat nga dal-on ang claim stub kag water tanker sa planta sang Flowater nga nahamtang sa Brgy. Nanga Pototan Iloilo.
4. Nagakadapat nga maglinya, magtughong sang tubig kag i-deliver sa mga barangay.

Apang gin-athag sang Flowater nga ang barangay mismo ang nagakadapat nga maghatag sang ila kaugalingon nga water tanker.

Sa mga makakuha na sang tubig, nagakadapat nga maghulat anay sang tatlo ka oras antes ini imnon bangud mataas pa ang chlorine content sini sa diin direkta ini nga ginakuha sa planta.

Ang tubig ang libre nga ipanagtag sang Flowater kag indi dapat ng ibaligya kag ginansyahan sang sin-o man nga tawo.

Ang madakpan kag matukiban nga nagabaligya sang tubig nga ginapanagtag sang flowater ang indi na liwat paghatagan sang libre nga potable water.

Sa mga pumuluyo nga may mga punong barangay nga wala pa nakahibalo nga may libre nga tubig, ipahibalo na sa ila kag panugyanan nga magpangita na sang water tanker.

Ang water tanker nga nagakadapat nga malimpyo antes sudlan sang tubig nga ilimnon.

Kun ang water tanker ang ginapanag iyahan sang Bureau of Fire Protection (BFP), Volunteer Fire Brigade ukon sang pribado nga tawo, ini ang batunon sang Flowater.

Apang nagakadapat nga ini ang may pahanugot halin sa punong barangay.

Kun ang Metro Iloilo Water District (MIWD) ang may yara sang identified nga mga barangay nga hatagan sang libre nga tubig, mahimo man nga makig-angot sa opisina sang Flowater.

Sa mga luyag nga magpamangkot sa libre nga tubig sang Flowater, mahimo magtawag sa telephone number nga 333-42-33 (please repeat) kag pangitaon lang si Ms. Rose Rafols.

Ang Flowater Resources Iloilo Incorporated ang sister company sang Bombo Radyo Philippines kag myembro sang Florete Group of Companies.