ILOILO CITY – Nagpaidalom sa quarantine ang Focal Person for COVID-19 sang Iloilo Fish Port Complex matapos naka-angkon sang close contact sa anak nga doktor nga una nga nagpositibo sa COVID-19.
Sa interview sang Bombo Radyo kay Dr. Justo Anaquita, tagpamaba sang Iloilo Fish Port Complex, iya ginpahayag nga makabig nga high risk contact si Engr. Romeo Pedregosa bangud nga kaupod sini sa balay ang anak nga doktor.
Suno kay Anaquita, ginahulat pa sa subong ang resulta sang COVID-19 test ni Pedregosa nga nagpakuha sang swab sample sang Agosto 29.
Ginpahayag ni Anaquita nga wala na nag-duty pa si Pedregosa matapos nagpakuha sang swab sample sang nasambit nga adlaw.
Wala lang sang tul-id nga detalye ang natungdan tuhoy sa doktor nga anak ni Pedregosa.
