Focus team sa pagpapas sang mga illegal gamblers, pagatukuron sang ICPO

Iloilo City – Mapatukod ang Iloilo City Police Office sang focus team batok sa illegal gambling.

Ini matapos nga narekord sang Police Regional Office 6 ang 227 ka mga operasyon humalin sang Enero 1 tubtob Marso 1, 2023 sa bilog nga rehiyon.

Sa numero nga ini, 718 ka mga indibidwal ang nadakpan kun sa diin nagdangat sa malapit P176,000 ang narekober nga kwarta.

Sa interview sang Bombo Radyo kay Police Major Shella Mae Sangrines, spokesperson sang Iloilo City Police Office, iya ginpahayag nga ginatutukan sang talatapan ang “one strike policy” ukon ang pagpapas sang tanan nga sahi sang illegal gambling.

Suno kay Sangrines, indi nagakadapat nga itolerar ang iligal nga pasugal sa syudad kun sa diin masami gintunaan sang kinagamo.

Ginpahayag dugang sang natungdan nga nagmando si Police Colonel Joeresty Coronica, officer-in-charge sang Iloilo City Police Office sa tanan nga mga station commanders nga magpakig-angot sa mga barangay officials agud matigayon ang pagkadakop sang mga sugarol.