ILOILO CITY – “Ginsinggitan, gin-harass, kag ginsumbag.”
Ini ang alegasyon sang isa ka food delivery rider batok sa isa ka personnel sang Iloilo City Anti Smoking Taskforce (ICAST) nga amo suno sa iya ang nag-apprehend sa iya bangud sa pahayag nga nagapanigarilyo siya sa non-smoking area sa Barangay San Rafael, Mandurriao, Iloilo City.
Matandaan nga sang damlag lang, naglapta sa social media ang video kun sa diin nagasinggitanay ang mga tawo kag nagapahayag nga ginsumbag sang isa ka ICAST enforcer ang isa ka rider.
Ang food delivery rider amo si Joemarie Uriarte samtang ang ICAST personnel naman amo si George Bago, Jr..
Sa interview sang Bombo Radyo kay Uriarte, iya ginpahayag nga nagbakal siya matuod sang sigarilyo sang amo nga tion apang nagpalayo siya sa tiangge kag wala man sang tawo sa iya palibot.
Pahayag ni Uriarte, nadakpan na siya sang una gani napaathag naman sa iya nga kun manigarilyo siya, kinahanglan siguraduhon nga 10 ka metros halin sa mayor nga dalan kag 10 ka metros halin sa ginbaklan ang iya nga kalayuon.
Nakibot si Uriarte bangud sa iya ginapahayag malain nga approach sang ICAST enforcer. “Gin-gulpi de gulat ya ko. Siling ya, ‘To ID mo diin?” Suno kay Uriarte, nagbulig man ang team leader sang enforcers para nga isyuhan siya sang ticket “apang daw naga-gwa nga indi siya pwede nga makakwestyon sa iya sala.”
“Kun singgitan ang isa ka tawo, natural reaction man na sang tawo nga magsinggit man,” suno kay Uriarte sa pahayag nga nagpaninggit siya kag namwersa.
Nagareklamo man si Uriarte bangud sa wala nagasanto nga paathag sang mga personnel sang ICAST kun ngaa nakomiter niya ang violation.
Suno sa iya, siya mismo ang nagsugo sa ICAST enforcers nga magtawag sang pulis agud nga mapaathag sa iya kun ano ang iya sala, kag kun ano gid ang implementing rules.
Ginpahayag ni Uriarte nga sang amo nga tion, nagalain na ang iya nga pamatyag kag nagpadayon man sa pagpalapit sa iya ang mga personnel sang ICAST: “Daw mga wala sang konsiderasyon.” Suno sa iya, nagalakat-lakat lang siya agud mapatawhayan ang kalain sang iya pamatyag.
Sang nag-abot sa police station, nagbayad si Uriarte sang P2,500 sa iya citation ticket.
Handa man ang natungdan nga magpasaka sang kaso batok sa ICAST personnel.
Apelar naman niya sa mga enforcers, siguraduhon nga maathag ang implementing rules kag husto man ang pamaagi sa pag-apprehend sa mga nagalapas sa pagsulundan.
Una naman nga nagdepensa sa Bombo Radyo Iloilo ang ICAST personnel nga si Bago kag nagpahayag nga wala siya nagpanakit kag wala siya nagpanumbag.
