Indi pa bastante ang mga ginpanagtag nga food packs nagikan sa Department of Social Welfare and Development (DSWD) sa 10 ka mga barangay sang syudad sang Iloilo.
Sa interview sang Bombo Radyo kay Punong Barangay Rizalino Salazar sang Ma. Clara, Iloilo City Proper, iya ginpahayag nga 30 lamang ka food packs ang ila nga nabaton.
Suno kay Salazar, sa kapin 180 ka pamilya sa iya nga barangay, pat-od nga indi mapanagtagan sang food packs ang tanan.
Dugang pa niya, pasalamatan na lamang nila ang nabaton nga bulig kag ipanagtag ang 30 ka food packs sa mga kubos niya nga pumuluyo nga wala sang trabaho.
Nahibaluan nga ang Iloilo City ang may 180 ka barangay.
Samtang sa Barangay Tanza Bonifacio, Iloilo City, 37 pa lamang ka food boxes ang nahatag.
Sa interview sang Bombo Radyo kay Punong Barangay Willie Jamolo, iya ginpahayag nga kapin 615 ka mga household ang yara sa iya nga lugar.
Suno kay Jamolo, ginapahangop niya sa iya mga pumuluyo nga ang mga kubos lamang kag halos wala na sang kalan-on ang hatagan nila sang food boxes bangud kulang gid ang nag-abot nga ayuda para sa ila nga lugar.
Sa pihak sini, nagapasalamat na lamang ang opisyal sa nag-abot nga bulig para sa ila nga lugar nagikan sa gobyerno.
