Madayon gid ang deklarasyon sang food security emergency sa Pilipinas sa masunod nga semana.
Ini matapos nga naghatag na sang suporta si President Ferdinand Marcos, Jr. sa amo nga tikang sa rason nga mapwersa suno sa iya nga mapanubo ang presyo sang bugas sa mga merkado.
Suno kay President Marcos, bisan nga nagnubo na ang gasto sa produksyon, mataas gihapon ang presyo.
“Hindi nasusundan and supply and demand curve. Dahil hanggang ngayon kahit ibaba mo lahat ng inputs, ang pagbenta pa rin mataas pa rin,” pahayag sang chief executive. “And so we have to force that price down and we have to make sure that the market works properly,” dugang sini.
Sang Hulyo sang nagligad nga tuig, nagsiling ang economic managers nga mabuhinan sang P5-P6 per kilo ang presyo pag-abot sang Agusto kun matapyasan na sang gobyerno ang taripa sa imported rice sa 15% halin sa 35%.
Gin-aprubahan ni Marcos ang amo nga tikang, apang santo sa monitoring sang Department of Agriculture, nagnubo matuod ang presyo sa imported well-milled kag regular milled rice varieties apang mataas gihapon ang special kag premium rice.
Sini nga semana, gin-aprubahan sang National Price Coordinating Council (NPCC) ang resolution nga magatulod sa DA nga magdeklarar sang “food security emergency for rice”.
Kun mahimo na sang DA ang deklarasyon, matugutan naman ang National Food Authority (NFA) nga mapaguwa ang ila nga buffer stock sang bugas para ma-stabilize ang presyo. Ang stocks nga iga-release ang paga-islan sang locally produced rice para nga masuportahan naman ang Filipino farmers.#
