Gin-anunsyo ni Agriculture Secretary Francisco Tiu Laurel Jr. nga posible nga sa Martes, Pebrero 4, sini ma-deklarar ang food security emergency.
Ini matapos pormal na nga nabaton sang iya opisina ang resolution nga aprubado sang National Price Coordinating Council (NPCC) nga amo ang naga-rekomendar sang deklarasyon.
Sa bilog nga pungsod ang implementasyon sang sini nga deklarasyon.
Suno kay Laurel, magasapol siya sa mga opisyal sang National Food Authority (NFA), Food Terminal Inc. kag Kadiwa para mahitso ang mga plano sa rollout.
Pahayag pa sang tiglikom, mahimo mabaligya sang NFA ang ila rice stocks sa presyo nga P36 per kilo sa local government units, kag mahimo naman ini ibaligya sang lokal nga panguluhan sa presyo nga P38 per kilo.
Gindugang sini, kun maka-release ang NFA sang 300,000 tonelada sang bugas sa market sa sulod sang anum ka bulan, mapanubo sini ang retail price sa bugas kag mahatagan pa sang espasyo ang ahensya para sa procurement sang palay.
Ginpasalig man ni Tiu Laurel nga sarang ma-justify sang DA ang legalidad sang food security emergency pananglitan kwestyunon ini sa korte.
Sa idalom sang Republic Act 12078 ukon ang Agricultural Tariffication Act, kun may yara na sang rekomendasyon halin sa price council, mahimo magdeklarar ang Department of Agriculture sang food security emergency agud masolusyunan ang supply shortages ukon ang extraordinary increases sa presyo sa bugas.
