Tutukan sang newly-appointed officer-in-charge City Agriculturist ang food security sa syudad sang Iloilo.
Sa interview sang Bombo Radyo kay Mr. Inigo Garingalao, iya ginpahayag nga dapat gid hatagan sang atensyon ang bastante nga suplay sang pagkaon ilabi na bangud yara pa ang COVID-19 pandemic.
Ini suno sa iya ang marching order ni Iloilo City Mayor Jerry Treñas sang siya ang gindesignar sang nagligad nga semana bilang bag-o nga pinuno sang City Agriculture Office.
Iga-introduce sang talatapan ang integrated farming ukon ang agricultural systems nga nagaupod sa livestock kag crop production ukon pag-upod sang fish kag livestock.
Tanan ini suno kay Garingalao ang himuon nga may environmental direction.
Samtang nagapungko bilang bag-o nga city agriculturist, nagapabilin gihapon si Garingalao bilang director sang Iloilo City Anti-Smoking Task Force.
Ginpasiguro sang natungdan nga matungdan sa gihapon ang mga responsibidad sa duha ka talatapan sa bulig sang iban nga mga personnel.
Magapabilin si Garingalo sa pwesto sa City Agriculture Office tubtob may igadesignar liwat si Mayor Treñas bilang permanente nga pinuno sang talatapan.
