Kadamo sang fans nga gusto makakuha sang bisan ano lang halin sa ila nga mga idol — halimbawa bisan T-shirt lang, pirma, picture, ukon bisan ano lang nga makapalipay sa ila.
Apang pinasahi ang isa ka football fan sa Brazil nga nag-deklarar sa isa ka testamento nga ang Brazilian football superstar nga si Neymar, Jr. amo ang magasubli sang tanan niya nga manggad kun mapatay na siya!
Indi pa man tigulang ang amo nga fan bangud naga-edad pa lamang ini sang 31 anyos, apang iya gin-ako nga indi na maayo ang iya nga ikaayong lawas.
Suno sa wala na gin-identify nga fan, tuman ang iya nga pagpalangga sa national football team kag sa legasiya sang Brazil sa amo nga sports. Maka-relate man ini sa istorya sang kabuhi ni Neymar, Jr. kag ginadayaw gid sini kun daw ano ini ka family-oriented kag kun ano sini ka palangga ang iya nga amay.
Ginpahayag man sang fan nga wala siya sang bilinan sang iya pagkabutang bangud indi man niya gusto nga gobyerno ukon ang iya nga mga himata ang makakuha sini, samtang nagapati naman siya nga indi dalok si Neymar,Jr. nga malaka na lamang nga batasan subong nga panahon.
Suno pa sa fan, pila ka beses na siya nga nagtinguha nga ihatag sa Paris Saint-Germain striker ang iya nga assets, apang ang pagbutang sang iya pangalan sa last will and testament amo ang makahimo sini nga legal.
Pirmado na ini nga dokumento sa notary’s office sa Porto Alegre.
Madamo ang naham-ot bangud isa man multi-millionaire player si Neymar kag ginakilala nga isa sa highest-paid athletes sa bilog nga kalibutan.
Nagapang-12 ang nasambit nga 31-anyos nga footballer sa listahan sang Forbes sa best-paid sportsmen sa kalibutan kag nagdangat sa $85 million ang iya nga estimated earnings sa 2023.#
