Isa ka player ang gindala sa Bicol Regional Training and Teaching Hospital sang nagluntad ang tensyon kag sang ulihi nag-ilinaway na kadungan sang football (men’s division) championship match sa Palarong Bicol 2024.
Sambuwa ini sa tunga sang mga team sang Masbate kag Naga kun sa diin nakuha mismo sa live stream ang natabo nga pagtapungulay kag sipaay.
Indi pa maathag kun ano ang ginhalinan sang inaway, apang sandig sa inisyal nga impormasyon, may intanay sa skor matapos nagdaog ang Masbate team, 5-0. May inisyal man nga impormasyon nga ang nag-umpisa sa away amo ang players sang Naga nga red-carded.
Ginpahayag man nga antes pa man ang kick-off, may “sportsmanly tension” sa tunga sang players nga pareho nga gusto nga mabulsa ang gold.
Indi lang players ang nagginamo bangud sa separado nga video, may mga kabataan man sa sports complex nga nagalantaw lang sang football match kag sang ulihi nag-ilinaway man.
Gina-imbestigaran na sang Department of Education Regional Office V ang nasambit nga insidente.#
