Ginkabos ang Philippine men’s national football team nga maka-abante kuntani sa labing-una nga tion sa finals sang ASEAN Championship.
Ini matapos nalutos sa powerhouse team sang Thailand, 3-1, sa extra time sang second leg sang semifinals subong nga gab-i sa Rajamangala Stadium sa Bangkok.
Una nga naka-skor para sa defending champions si Peeradon Chamratsamee sa ika-37 nga minuto sang hampang kag ginsundan ni Patrik Gustavson sa 54th minute.
Wala nagpangampo ang Pilipinas kag nabuhian sang paglaum sang naka-goal si Bjorn Martin Kristensen sa 84th minute nga amo ang nagpatas sa aggregate score sang duha ka mga team, 3-3.
Pag-abot sa extra time, diri na kag nakuha sang Thais ang kadalag-an nga ginkahugyaw sang malapit 32,000 fans sa home field matapos nagsulod ang star striker nga si Suphanat Mueanta bilang substitute. Ang iya late header sa 116th minute amo ang dalayon nga nagpa-abante sa powerhouse team sa finals paagi sa 4-3 aggregate.
Antes ang Leg 2, matandaan nga ginpatilaw anay sang Pilipinas ang Thailand sang mapait nga kalutusan sa imbukada sang semifinals, 2-1. Ini ang una nga pagdaog sang Pilipinas batok sa Thai booters sa sulod sang masobra lima ka dekada.
Sunod nga atubangon sang Thailand ang Vietnam sa final game. Kun sila ang magdaog, ini na ang ila ikatatlo nga sunod-sunod nga korona sa sini nga tournament.
