Nagtaliwan na bangud sa cancer ang 76-anyos nga American football great nga si Orenthal James Simpson ukon mas kilala nga si O.J.
Isa si Simpson ka cultural icon nga kilala sa football field kag sang ulihi pati na sa mga pelikula kag mangin sa commercials.
Apang sang 1994, natabo ang mas nagpalakaak pa sang iya pangalan — ang kamatayon sang iya anay asawa nga si Nicole Brown Simpson kag iya abyan nga si Ronald Goldman.
Si O.J. ang gintudlo nga suspek sang amo nga tion apang gin-acquit sa Los Angeles jury — isa ka hitabo nga ginalaragway sang kadam-an nga “trial of the century” bangud sa tuman ka interesante nga kaso nga gintutukan sang minilyon nga mg Amerikano.
Sa amo nga kaso naglibot ang istorya sang halos tanan nga media sa Estados Unidos sang Amerika: isa ka manggaranon nga celebrity defendant; Black man nga gin-akusahan sa pagpatay sa iya maputi nga anay asawa bangud sa pagpangimon; misis nga ginpatay bangud sa pag-file sang divorce sa mister nga nagasakit sa iya; ang “dream team” sang charismatic nga defense lawyers; kag ang daku nga kahuy-anan sa prosecutors.
Sang amo nga tion, madamo nga Black Americans ang nag-selebrar sang pag-acquit sa iya sang korte bangud nagapati sila nga gin-frame lamang si O.J. sang puti nga “racist” nga mga pulis; samtang ginkaakig naman ini sang white Americans.
Masobra isa ka dekada matapos ang amo nga kaso, napreso man gihapon si Simpson sa sulod sang siyam ka tuig sa Nevada matapos na-convict sang 2008 sa 12 counts sang armed robbery kag kidnapping sa duha ka sports memorabilia dealers sa gunpoint sa Las Vegas hotel.
Napaguwa siya sang 2017 paagi sa parole kag ginsaylo sa bantay-sarado gihapon nga lugar sa Las Vegas.
Nahatagan ini sang temprano nga release sang 2021 sa edad nga 74 bangud sa iya maayo nga paggawi samtang ginabantayan sang otoridad.
Ang mga hitabo sa iya kabuhi ang nakabutang sa Oscar-winning 2016 documentary nga “O.J.: Made in America” amo man sa nagkalain-lain nga TV dramatizations.#
