ILOILO CITY- Todo pagpanghanda na ang football team sang Iloilo-Secondary level nga magatiglawas sang Region 6 sa Palarong Pambansa 2023.
Sa interview sang Bombo Radyo kay Japheth Buenalatrona, coach sang Iloilo football team nga gina-represent sang mga players halin sa Barotac Nuevo National Comprehensive High School, iya ginpahayag nga naga-focus subong sa physical development ang mga players bangud ginalauman nga mas dalagko ang mga players nga ila makaatubang.
Suno kay Buenalatrona,sa taktikal nga aspeto, gina-polish na nila ang mga estratehiya nga ila himuon sa field.
Matandaan nga naghampang anay ang Iloilo football team sa Cluster 3 Pre-Palarong Pambansa Qualifying Meet sa Cebu City sang nagligad nga Hunyo 14 tubtob 17, 2023 kun sa diin sila ang nagkampeon gani sila ang maga-advance sa Palarong Pambansa 2023 sa Marikina City sa Hulyo 29 tubtob Agusto 5, 2023.
Nahibaluan nga ang Region 6 man ang defending champion sa Palarong Pambansa nga ulihi nga ginpatigayon sang 2019 apang napaiway sang tatlo ka tuig bangud sa pandemya.
